Styrevervskurs 2026 - Selbu

Få eit klubbstyre som:

«Det er utruleg kor stor skilnad det er å vere Klubbrådgjevar for eit styre som har vore på styrevervskurs, og eit styre som ikkje har det. Har dei vore på kurs er dei mykje meir sjølvstendige!»

- Laila Helene Halvorsen, Klubbrådgjevar i Jaguar 4H

I 4H er det medlemmane sjølv som sit i styret og skal drive 4H-klubben sin. For å kunne gjere dette er dei avhengige av å vite kva som krevst av dei, og kva for oppgåver dei ulike verva i eit styre har. Dette lærer dei på styrevervskurs! I tillegg får dei møtt andre 4H-arar frå ulike stadar i fylket, utveksla idear og får nye impulsar.

I Trøndelag har vi 3 styrevervskurs i 2026.

Nedst på sida finn du ei oversikt over kursa, og kva for klubbar vi ønskjer oss at meldar seg på kva for kurs. Grunnen til at vi har fordelt klubbane er for å hindre at det vert veldig skeivfordeling i talet på deltakarar på kvart kurs.

For både arrangørar, instruktørar og deltakarar er det best med tre relativt like store kurs fordelt i fylket. Ikkje alle er sett opp på det nærmaste kurset geografisk, men dette vil jamne seg ut over år når kursa er på ulike stadar i fylket.

Påmeldingsfrist: 15. desember.

Fristen gjeld for alle tre kursa!

Det er to typar kurs å velje mellom:

Verv-kurs: For dei som er nye i vervet sitt eller ikkje har vore på kurs tidlegare.

Vel mellom Leiar/nestleiar, Sekretær, Kasserar og Styremedlem.

DRIV: DReven, men IVrig på å lære noko nytt?

Dette er eit kurs for dei som er 15 år (f. 2010) eller eldre, og som har vore på kurs i sitt verv tidlegare. På dette kurset lærar ein om organisasjonsdrift, verving, kommunikasjon og samarbeid, arrangementsplanlegging og liknande.

Vaksenleiarar

For å kunne gjennomføre kurset på ein god nok måte er vi nøydd til å ha med nokre ekstra vaksne. Vi treng 1 vaksen per 10. deltakar, som melder seg på som «vaksenleiar». Som vaksenleiar er ein nærmaste kontaktperson til sine deltakarar, tar ansvar for dei og passar på at de søv, et og har det bra. Snakk gjerne med naboklubben/klubbane og organiser felles vaksenleiar til kurset.

ÅLVÅGS: Å Lære Ved Å Gjere Saman

På sundag har alle kursa eit felles opplegg, der dei skal arbeide i grupper på tvers av kursa. Kva opplegget er får dei ikkje vite før dei møter opp på morgonen. Poenget med økta er å øve på samarbeid, gjennom praktiske oppgåver.

Under ser du ei enkel oversikt over programmet for kurshelga.

Eit meir detaljert program, samt pakkeliste og anna informasjon kjem på e-post til dei som melder seg på kurs.

Deltakaravgift

Pris pr. deltakar er 1100,-

Dette dekkjer overnatting, alle måltid, kurs og kursmateriell og administrasjonsutgifter.

Pris pr. vaksenleiar er 400,-

Dette dekkjer overnatting, alle måltid og administrasjonsutgifter.

Det er vanleg at 4H-klubben betalar for sine deltakarar. Klubbar som sender felles vaksenleiar kan godt fordele kostnaden på denne mellom seg. Fakturaen vert sendt til klubbane frå 4H Norge.  Hugs å sjekk søppelposten, vi opplever at e-post frå 4H kan hamne der.

Kontakt

Ansvarleg for styrevervskurset i 4H Trøndelag er organisasjonsrådgjevar Ingveig Bustad Hegland

E-post: ingveig.bustad.hegland@4H.no
Telefon: 481 95 458

(Hugs å signer sms og e-post med namn og klubb, så eg veit kven som tar kontakt.)

Fordeling av klubbar på dei ulike styrevervskursa

Fordelinga er eit utgangspunkt! Viss din klubb ikkje kan delta på det kurset det er sett opp på, kan ein sjølvsagt melde seg på eit av dei andre kursa.